Creadigrwydd a’r Cwricwlwm Cymraeg

Hoffai Ysgol y Gymraeg Prifysgol Caerdydd, mewn cydweithrediad ag Adran y Gymraeg ac Astudiaethau Celtaidd Prifysgol Aberystwyth, a’r Coleg Cymraeg Cenedlaethol, wahodd ceisiadau gan unigolion a chanddynt ddiddordeb mewn astudio ar gyfer y ddoethuriaeth uchod.

Pennaf nod y prosiect yw ymchwilio i ‘greadigrwydd’ fel cysyniad deallusol cyn archwilio goblygiadau creadigrwydd ar lefel ymarferol yn y dosbarth Cymraeg yng nghyswllt Cwricwlwm i Gymru. Disgwylir y bydd deiliad yr ysgoloriaeth yn tafoli gwahanol theorïau rhyngwladol, yn casglu a dadansoddi data ansoddol mewn ysgolion Uwchradd, ac yn sgil hyn yn adeiladu ar arferion da yn y maes wrth lunio a threialu ymarferion creadigol newydd yn y dosbarth gan gyflwyno astudiaethau achos.

Rydym yn chwilio am ymgeiswyr brwdfrydig ac uchelgeisiol a chanddynt ddiddordeb mewn ysgrifennu creadigol ac addysgu. Bydd ymgeiswyr yn meddu ar radd dosbarth 1af neu 2:1 uchel, ac yn ddelfrydol wedi cwblhau’n llwyddiannus gwrs ôl-radd mewn pwnc addas cyn cychwyn ar y prosiect hwn.

Bydd yr ymchwil yn cael ei chyfarwyddo gan Dr Rhiannon Marks o Brifysgol Caerdydd ar y cyd â’r Athro Mererid Hopwood o Brifysgol Aberystwyth.

Mae’r Ysgoloriaeth hon wedi ei hariannu’n llawn am 3 blynedd gan y Coleg Cymraeg Cenedlaethol ac Ysgol y Gymraeg, Prifysgol Caerdydd.